ແຈ້ງການກ່ຽວກັບການຄັດເລືອກເອົາພະນັກງານລັດ ແລະ ພາກເອກະຊົນ ສະໝັກຮັບທຶນຮຽນຕໍ່

Thông báo về học bổng Thạc sĩ, Tiến sĩ Dành cho sinh viên Lào đã tốt nghiệp bậc Đại học (Lưu ý phải đang là Cán bộ đã được biên chế từ 2 năm trở lên)

ແຈ້ງການກ່ຽວກັບການຄັດເລືອກເອົາພະນັກງານ ເພື່ອສະໝັກຮັບທຶນການສຶກສາ ລະດັບປະລິນຍາໂທ ແລະ ປະລິນຍາເອກ

ກ່ຽວກັບການຄັດເລືອກເອົາພະນັກງານ ເພື່ອສະໝັກຮັບທຶນການສຶກສາ ລະດັບປະລິນຍາໂທ ແລະ ປະລິນຍາເອກຂອງ ສສ ຫວຽດນາມ, ສຳລັບສົກຮຽນ 2017-2018.
– ອີງຕາມຂໍ້ຕົກລົງ ວ່າດ້ວຍການຮ່ວມມື ລະຫວ່າງລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ທີ່ໄດ້ລົງນາມຢູ່ນະຄອນຫຼວງຮ່າໂນ້ຍ ສສ ຫວຽດນາມ ຄັ້ງວັນທີ 8 ກຸມພາ 2017.
– ອີງຕາມຂໍ້ຕົກລົງຂອງລັດຖະມົນຕີກະຊວງສຶກສາ ແລະ ກິລາ ວ່າດ້ວຍການແຕ່ງຕັ້ງຄະນະຮັບຜິດຊອບ “ໂຄງການຍົກສູງຄຸນະພາບ ແລະ ປະສິດທິຜົນການຮ່ວມມືລາວ-ຫວຽດນາມ ໃນຂົງເຂດການສຶກສາ ແລະ ພັດທະນາຊັບພະຍາກອນມະນຸດ ໄລຍະ 2011-2020”, ສະບັບເລກທີ 2936/ສສ.ຜຮ/2011, ລົງວັນທີ 26 ສິງຫາ 2011.
ປະຕິບັດຕາມແຜນການຮ່ວມມືປະຈຳປີ 2017 ລະຫວ່າງກະຊວງສຶກສາທິການ ແລະ ກິລາ ແຫ່ງ ສປປ ລາວ ແລະ ກະຊວງສຶກສາ-ກໍ່ສ້າງ ແຫ່ງ ສສ ຫວຽດນາມ ທີ່ໄດ້ລົງນາມຢູ່ນະຄອນຫຼວງຮ່າໂນ້ຍ ສສ ຫວຽດນາມ ຄັ້ງວັນທີ 8 ກຸມພາ 2017. 9102 4020 6898

ກະຊວງສຶກສາທິການ ແລະ ກິລາ ຂໍຖືເປັນກຽດແຈ້ງມາຍັງທ່ານຊາບວ່າ: ໂດຍປະຕິບັດຕາມການຊີ້ນຳຂອງ 2 ລັດຖະບານ ແຫ່ງ ສປປ ລາວ ແລະ ສສ ຫວຽດນາມ, ກ່ຽວກັບການສະໝັກຮັບທຶນການສຶກສາລະດັບປະລິນຍາໂທ ແລະ ປະລິນຍາເອກ ໃນສົກຮຽນ 2017-2018 ຂອງລັດຖະບານ ສສ ຫວຽດນາມ ແມ່ນຈະໄດ້ເປີດກວ້າງຄືກັບປີຜ່ານມາ, ໝາຍຄວາມວ່າ ທຶນຂອງແຕ່ລະຂະແໜງ ຈະບໍ່ໄດ້ເຈາະຈົງໃຫ້ສະເພາະຂະແໜງການທີ່ກ່ຽວຂ້ອງເທົ່ານັ້ນ ເປັນຕົ້ນ ວິຊາໃດທີ່ພົວພັນກັບຫຼາຍພາກສ່ວນ ຜູ້ທີ່ເຮັດວຽກງານກ່ຽວຂ້ອງ ກໍ່ສາມາດສະໝັກແຂ່ງກັນໄດ້ ລວມທັງພາກລັດ ແລະ ພາກເອກະຊົນ.

ເພື່ອປະຕິບັດທຶນການສຶກສາຂອງລັດຖະບານ ສສ ຫວຽດນາມ ທີ່ສະເໜີໃຫ້ແກ່ລັດຖະບານ ສປປ ລາວ ສຳລັບສົກຮຽນ 2017-2018 ໃຫ້ທັນກັບເວລາທີ່ 2 ຝ່າຍໄດ້ກຳນົດໄວ້, ກະຊວງສຶກສາທິການ ແລະ ກິລາ ຈຶ່ງແຈ້ງມາຍັງພາກສ່ວນຕ່າງໆ ເພື່ອຄົ້ນຄວ້າຄັດເລືອກເອົາພະນັກງານຂອງທ່ານ ສົ່ງເຂົ້າສະໝັກຮັບທຶນການສຶກສາຕາມຂະແໜງການ (ວິຊາຮຽນ) ແລະ ຈຳນວນທຶນ (ຕາມສາລະບານເລກ 1) ດັ່ງລຸ່ມນີ້:

1. ຂະແໜງການສຶກສາທິການ ແລະ ກິລາ ຈຳນວນ 79 ທຶນ (ປະລິນຍາໂທ 71 ທຶນ ແລະ ປະລິນຍາເອກ 8 ທຶນ).
2. ຂະແໜງສິລະປະ ແລະ ມະນຸດສາດ ຈຳນວນ 10 ທຶນ (ປະລິນຍາໂທ 10 ທຶນ ແລະ ປະລິນຍາເອກ 0 ທຶນ).
3. ຂະແໜງວິທະຍາສາດສັງຄົມ, ຂໍ້ມູນຂ່າວສານ, ໜັງສືພິມ ຈຳນວນ 15 ທຶນ (ປະລິນຍາໂທ 15 ທຶນ ແລະ ປະລິນຍາເອກ 0 ທຶນ.
4. ຂະແໜງການບໍລິຫານທຸລະກິດ ແລະ ກົດໝາຍ ຈຳນວນ 29 ທຶນ (ປະລິນຍາໂທ 23 ທຶນ ແລະ ປະລິນຍາເອກ 6 ທຶນ).
5. ຂະແໜງເຕັກໂນໂລຊີຂໍ້ມູນຂ່າວສານ ແລະ ການສື່ສານ ຈຳນວນ 8 ທຶນ (ປະລິນຍາໂທ 7 ທຶນ ແລະ ປະລິນຍາເອກ 1 ທຶນ).
6. ຂະແໜງເຕັກນິກ, ການຜະລິດ, ການຄ້າ ແລະ ການກໍ່ສ້າງ ຈຳນວນ 31 ທຶນ (ປະລິນຍາໂທ 30 ທຶນ ແລະ ປະລິນຍາເອກ 1 ທຶນ).
7. ຂະແໜງກະສິກຳ, ປ່າໄມ້, ການປະມົງ ແລະ ສັດຕະວະແພດ ຈຳນວນ 10 ທຶນ (ປະລິນຍາໂທ 10 ທຶນ ແລະ ປະລິນຍາເອກ 0 ທຶນ).
8. ຂະແໜງສາທາລະນະສຸກ ຈຳນວນ 10 ທຶນ (ປະລິນຍາໂທ 8 ທຶນ ແລະ ປະລິນຍາເອກ 2 ທຶນ).
9. ຂະແໜງສະຫວັດດີການ ຈຳນວນ 6 ທຶນ (ປະລິນຍາໂທ 6 ທຶນ ແລະ ປະລິນຍາເອກ 0 ທຶນ).
10. ຂະແໜງການບໍລິການ ແລະ ຂົນສົ່ງ ຈຳນວນ 13 ທຶນ (ປະລິນຍາໂທ 13 ທຶນ ແລະ ປະລິນຍາເອກ 0 ທຶນ).
+ ສຳລັບວິຊາຮຽນຂອງແຕ່ລະຂະແໜງການມີລາຍລະອຽດຢູ່ໃນສາລະບານເລກ 1.
I./ ເງື່ອນໄຂຂອງທຶນທີ່ຝ່າຍ ສສ ຫວຽດນາມ ຮັບຜິດຊອບ:
ຄ່າຮຽນ, ເບ້ຍລ້ຽງປະຈຳເດືອນ, ຄ່າປະກັນສຸຂະພາບ, ຄ່າເດີນທາງໄປ-ກັບລະຫວ່າງຊາດ, ຄ່າທີ່ພັກອາໄສ, ຄ່າຮຽນກຽມພາສາຫວຽດນາມ ຢູ່ ສປປ ລາວ ກ່ອນອອກເດີນທາງ (ລວມທັງທຶນລະດັບປະລິນຍາໂທ ແລະ ປະລິນຍາເອກ)
II. ເງື່ອນໄຂທົ່ວໄປຂອງຜູ້ສະໝັກ.
1. ຜູ້ທີ່ເປັນອາຈານສອນຢູ່ສະຖາບັນການສຶກສາຕ່າງໆ ແມ່ນຈະໄດ້ຮັບບຸລິມະສິດເປັນພິເສດ ຕາມສາຍວິຊາສະເພາະ.
2. ຜູ້ທີ່ຮູ້ພາສາຫວຽດນາມ (ຮຽນຈົບມາຈາກ ສສ ຫວຽດນາມ) ຈະໄດ້ຮັບບຸລິມະສິດກ່ອນຜູ້ທີ່ບໍ່ຮູ້.
3. ຕ້ອງເປັນຄົນລາວ ຖືສັນຊາດລາວ ແລະ ດຳລົງຊີວິດຢູ່ ສປປ ລາວ ກ່ອນສະໝັກຢ່າງໜ້ອຍ 1 ປີ.
4. ຕ້ອງເປັນພະນັກງານສັງກັດລັດ ແລະ ພາກເອກະຊົນສົມບູນຢ່າງໜ້ອຍ 2 ປີ.
5. ຜູ້ທີ່ຈະສະໝັກຮັບທຶນລະດັບປະລິນຍາໂທ ຕ້ອງມີລະດັບການສຶກສາ ກ່ອນສະໝັກຕ້ອງຈົບປະລິນຍາຕີສົມບູນຂຶ້ນໄປ (ບໍ່ແມ່ນຈົບຊັ້ນສູງ ຫຼື ທຽບເທົ່າປະລິນຍາຕີ) ອາຍຸບໍ່ເກີນ 40 ປີ.
6. ສະເພາະຜູ້ທີ່ຈະສະໝັກຮັບທຶນລະດັບປະລິນຍາເອກ ຕ້ອງມີລະດັບການສຶກສາ ກ່ອນສະໝັກຕ້ອງຈົບປະລິນຍາໂທຂຶ້ນໄປ ອາຍຸບໍ່ເກີນ 50 ປີ ຢ່າງໜ້ອຍຕ້ອງເປັນຜູ້ທີ່ຮຽນຈົບລະດັບປະລິນຍາຕີ ຫຼື ປະລິນຍາໂທ ມາຈາກ ສສ ຫວຽດນາມກ່ອນແລ້ວ.
7. ຜູ້ທີ່ສະໝັກຮັບທຶນລະດັບປະລິນຍາໂທ ແລະ ປະລິນຍາເອກ ຕ້ອງຂຽນຫົວບົດຄົ້ນຄວ້າ ຜູ້ໜຶ່ງຕໍ່າສຸດ 2 ຫົວຂໍ້ ແລະ ຫົວຂໍ້ນັ້ນ ຕ້ອງຕໍ່ເນື່ອງຈາກວິຊາທີ່ຮຽນຈົບລະດັບປະລິນຍາຕີ/ປະລິນຍາໂທ,.
8. ຕ້ອງເປັນຜູ້ທີ່ມີສຸຂະພາບສົມບູນ ແລະ ແຂງແຮງດີ.
III. ວິທີດຳເນີນການສະໝັກ.
ຜູ້ທີ່ສົນໃຈ ໃຫ້ໄປພົວພັນ ແລະ ສອບຖາມລາຍລະອຽດ ຢູ່ກົມກິດຈະການນັກສຶກສາ (ເຂດສະໜາມກິລາເຈົ້າອານຸວົງ) ກະຊວງສຶກສາທິການ ແລະ ກິລາ ນັບແຕ່ວັນເຊັນແຈ້ງການສະບັບນີ້ ຈົນເຖິງວັນທີ 13 ເມສາ 2017 ເປັນວັນປິດຮັບສະໝັກ

ຮອງລັດຖະມົນຕີ
(ຫົວໜ້າຄະນະຮັບຜິດຊອບໂຄງການ).
ທ່ານ ຮສ.ດຣ ກອງສີ ແສງມະນີ

 

ຂ່າວສານຈາກ: ສຳນັກຂ່າວສານປະເທດລາວ

Credit: https://www.laopost.com/2017/03/21/87223

Trả lời

Email của bạn sẽ không được hiển thị công khai. Các trường bắt buộc được đánh dấu *